احمد لعيبي
انعزمت على عشا امس بعد ان كنت ميت جوع ..!!
الغريب اجه العشا عبارة عن خلطة تشبه الحكومة
لا تعرف الزغير من الجبير ..الدجاج تحسه بيه ريش
والبتيتا تشبه وزير للكهرباء شكله حلو وكهرباء ماكو ..!!
البرياني بيه بزاليا تشبه النائبات العراقيات اللي سون عمليات تجميل اسم الله عليكم لان اول مرة اشوف بزاليا معصعصه وعدها خدود ..صدكوني هيج البزاليا مثل نائبة رايحه ايفاد وعالواهس سوت عملية تجميل ...
اسم الله عليكم واني آكل حسيت بجسمي حكه واذاني اطكطك عبالك واحد يطك ظهره ..!!
التفت وراي شني ياربي يصير زلزال واني ما ادري
سالت الجماعة الياكلون وياي ..
يابه زلزال ..كالوا لا ليش ؟ كتلهم شو اذاني طكت واحس واحد يلعب مزليكَه بمعدتي ...!عبالك سياسي كردي يلعب بمقدرات كركوك اللي ضيعت هويتها العربية والتركمانية ...!!
باوعت زين بماعون البرياني وجان اشوف قطع مال فلفل حار يكطع الزردوم..
خاب صدك جذب ..برياني وفلفل حار ..
نكتت ايدي وذبيت الخاشوكة ورة ما طيرت ماعون البرياني بأكمله..
باوعت للجماعة اللي سووا البرياني كلتلهم راح اصير معارضة للبرياني مناه وهيج واطلع تظاهرة بالمطبخ والا اكَلب الطباخ عليكم ..!!
تقشمروني بالبرياني وطلع بيه فلفل...!!
الجماعة باوعولي تك وكالولي عمي يا احمد لعيبي سمي بإسم الله صارلك ساعة تاكل حتى الماعون كرطته وتريد تطلع مظاهرة علينا ..
جا وينك جنت عمي دبطل من اول لكَمة من ثاني لكَمة ...!
سوالف الفلفل ما تعبر علينا اكل و وصوص..!!
ترة البرياني يجنن بس خاف انت منشول بالبداية وبعدين حسيت بالفلفل..!
https://telegram.me/buratha
