فنطازيا الإنفلونزا السياسية..!

أحمد لعيبي   طبعا فلاونزة بالعظم لازمتني مثل تلازم العشاق في خريف العمر انام واكعد.. واكعد وانام.. كلت لازم اطلع من عالم البطانية لعالم الابرة والاسبجك والشارع بعد ليلة ماطرة غركت بيها بغداد مثل غركة العراق بالديون ..!! اتصلت بجماعة متصلين بيه واخذني الواهس بالحديث وشفت عربانه مال لبلبي وباقلاء كلت هاي خاتمة الشفاء والعلاج طبكت عالرجال لكيته ناشر الفلفل الاسود والبطنج والملح على كلينس لان غركانه العربانة امس ومتبللات .. كلت ميخالف محد يبيع غيره بهالوقت خل اكل يمه ..كتله اريد لبلبي بس كون حار لان فلاونزا ووضعي تعبان ..الرجال صبلي كاسة وخل الشطه الحمرة والفلفل كدامي وكالي انت خلي بكيفك. اني هم ما كلت باطل مثل برلماني يشرع قانون لروحه حطيت كلشي وما راعيت التوازن باللبلبي .. وفجأة وكف شخص على دراجة بس شكله مو قانوني كلش ..غمزلي ..طلع لسانه .عض شفته ..لا يالحمزة صدك جذب خاف صخنت ويتراولي يربي .. صاح على ابو العربانه صبلي مي لبلبي ..اجه اخذ بطل الشطه من كدامي وظل يغمز ويطلع لسانه ويضحك ..عبالك سياسي يضحك عالشعب بنهاية خدمته ..!!..لزمت كصتي ..شو ما مصخن اني .. شو جاب بطنج وترس مي اللبلبي مثل ما ترسوا الجماعة موازنة الاقليم وعافوا الجنوب يون (بسكوت اون بسكوت ) وأشرلي راد يخلي كتله ممنون ما اريد .. شو هذا جاب بطل الشطة وداره كله بالكاسة مالتي واني اتلاوه وياه عمي ما اريد.. يلاجي خير..ابو الشباب ..حشمت ابو العربانه يساعدني ..كالي عوفه هذا مثل الحكومة بالاربع سنوات تخرب كلشي وانكول بلكي الله غيرها وتجي غيرها تخرب كلشي وهم هيج..خليه يترس كاستك عود اني ابدلها الك وعلى حسابي ..!! كتله جا انت مفتح على باب الله لو على باب هذا المخلوق .. كالي وهو يضحك عمي علواه على هذا يحط بس شطه وبطنج ..دشوف العدنه يحطون نار ونفط وسم وبانزين ..!! كتله ان شاء الله تهون وبلكي ينصلح الحال ..شو هذا باوعلي وطلع لسانه وكام يطلع صوت .. كملت ملف اللبلبي بنص ساعة واخذت وحدة كلت اكلها بالسيارة لان ما تهنيت بالاولى .. فتحتها طلعت باقلاء مو لبلبي وفوكها شطه .. صدك جذب يا ربي .. جا احنه ماكو شي انريده ويطلع نفسه حتى اللبلبي ..!!   احمد لعيبي