بقلم :.احمد الياسري *
الله بالخير ..على مر الازمان العراقيين لازم جان يتجمعون بمكان يسولفون بيه ويفرغون هم كلوبهم واحد للثاني ومن اهم اماكن تجمع العراقيين بالمدن العراقية الي كانت ولازالت عامرة بناسها وجمهورها (الكهاوي العراقية ) ويمكن اسم الكهوة جاي من اسم (المقهى ) العربي و(المقهى ) هو المكان الي يشربون العرب بيه القهوة ، لان القهوة تعتبر مشروب العرب التاريخي ،واللي ورثوها العرب البدو الرحل من اجدادهم واحنا العرب النص ردن ،بدلنا سوالف اهنله وكمنا نشرب (كابجينووو) (فلات وايت ) ،، احنه خربطنا عادات اهلنه العرب وصرنا من جماعة (ابو جينو)،، ،،ظلت الكهاوي العراقية مكان قضاء وقت العراقيين وطبعا الكهاوي عدنا تتقسم الى عدة اقسام قسم منها كهاوي مال احياء شعبية تعبانة وناسها فقره ومشكلجية وقسم منها كهاوي نخبة يلتقون بيها الشعراء والادباء بس على تنوع الكهاوي ظلت بنضرب بيها المثل بعدم الانظباط والهوسة والخربطة ،،يعني كلمن يحجي بكيفة هسة مثلا مضايفنا الها قواعد والها قوانين اذا كعد الشيخ محد يحجي قبلة واذا كعد السيد ما يشربون جاي كدامة ،
والسوالف تندار وتتوزع بيها كلمن حسب دورة يعني ميصير اثنين يحجون بنفس الوقت فلذلك المثل ينضرب (يكولة انته ما مربوط بمضيف ) يعني ما ملتزم باخلاقية وقوانين المضايف ،،بس عمري ما سمعت واحد كال لواحد (انته ما مربوط بكهوة ) ،،،الامثال جانت دائما تضرب على الكهاوي بهوستها وخربطتها وكلمن يسولف بكيفة لا قانون يأدب ولا واحد يلتزم بالقانون حتى اذا موجود.. واليوم حال بلدنا يمكن ينطبق عليه هذا المثل يعني كهوة متكونة من اثمنطعش محافظة ،ويجوز واحد يكولي متستحي اكو واحد يشبه وطنة بالكهوة أكولة على عيني وراسي بس انطيني تشبيه اقرب من الكهوة للجاي انشوفة بالعراق ،،رطينة وهوسة واحد يجر بالطول اواحد بالعرض (شليلة وراسها ضايع ) ,,البرلمان صار عبارة عن كهوة متروسة حمايات ياهو العدة حماية انشط يفزع على الثاني ويفشخة ،هاي كهوتنا البرلمانية الديمقراطية الجبيرة ،،الوزارات العراقية صارت عبارة عن كهاوي كلساع طاب واحد وطالع واحد ومندري شنو السالفة ، المؤسسات الحكومية والخدمية صارت كهاوي نركيلة وغرشة المدراء حاطين نركيلاتهم ويشربون بالكهوة والجاي ،ومايشوفون المواطن الا بالتلفزيون ، اللجنة الاولمبية العراقية الي هي بيت القصيد هاي كهوة من نوع خاص لا شايف ولا سامع بمثلها ،، اتأسست الكهوة الاولمبية العراقية ،قصدي اللجنة الاولمبية بزمان عمنا بريمر عليه السلام ،وتدرون بذاك الوكت شلون الوضعية جانت يعني ماجان اكو شي اسمه دولة عراقية الاحزاب كلمن جايب ربعة وينصب بكيفة ، الحرامية يقسمون والارهابية يقسمون والبلد جان تايه ،فاجو مجموعة من الرياضيين من اعضاء لجنة عدي الاولمبية السابقة وطبعا بيهم الطيب وبيهم الخبيث لان كانت وياهم اسماء رياضية محترمة ,نتج عن اجتماعهم انتخاب احمد الحجية لرئاسة اللجنة وحسين سعيد اتحاد الكرة ،، خوية همه انتخبوا حسين سعيد لو طركاعة وكعت على روسنا ،تحول حسين بليلة وضحاها الى قائد عسكري يملك صلاحيات بوش ما يملكها ،اولا كاعد بالاردن ويدير الاتحاد بالموبايل ثانيا يتلي على عمرة اليفك حلكة وياه راسأ يهددة بالفيفا ويكولة اللجنة لا تتبع الدولة ((خاخوية ابو عليوي اذا انته زلمة هيج ليش ما كلت لــ عدي صدام هذا الحجي شو جنت ترجف منه وما تدري ياساعة يوديك للرضوانية ،هسه صرت بروسنا ابو الزعر )) اتدور انجازاتك شنهي ما تكلي بروح ابوك ،،خبصنا هذاك اليوم من طلع على الشرقية كاس اسيا ما كاس اسيا ،عمي ساعة السودة الي اخذنا بيها كاس اسيا ،اشو المنتخب الاولمبي فضحنا فضيحة وطلع معلوس وي استراليا ،الشباب طلع من بطولة اسيا ،الناشئة هم ذبولة كشر موز وطلع من المنافسة ،الاندية من فضيحة اربيل لخسارة الجوية ،،شنهي الانجاز ما تكلي ثانيا كاس اسيا انت الجبته وادارتك لو فيييرا المسكين ،ثالثا اذا انته هيج بطل صعد العراق لكاس العالم يالله ،
مو ذاك اليوم علسونه اثنين صفر بقطر وظلت الوادم تضحك علينا رابعا كل وعقلك العراق يغلب استراليا وتراهن على مباراة استراليا عمي روح العب غيرها هواي احسنلك ،انعلق مشاركتنا بالمحافل الدولية احسن ما ننفضح على الاقل نكول الاتحاد الدولي حرمنا بس من نروح بهيج فريق يفشل ونخسر مو تظل الوادم تضحك علينه و احنا ابطال اسيا ،حتى قرار الحكومة اجة متأخر اللجنة الاولمبية كان لازم تنحل من زمن حكومة علاوي ،وكان لازم ينعاد النظر ببناء الرياضة العراقية بناء صحيح مو معتمدين على جم واحد مخربط يغامرون باسم العراق الرياضي ،،عمي اتدور انته بلاتر شبيك يبعد عمك احترك ذيلك جا اذا انته حريص على الرياضيين العراقيين من جان عدي ينومهم بالتوابيت مال الرضوانية شو ما فكيت حلكك ولا كلت حقوق الرياضيين! هسه من حشمك حسين تعيس وكالك سدو الكهوة مالتي اتخبلت علينه ، ثانيا اشو عمرك ما مديت ايدك بجيبك وكلت هاي جم فلس للفرق العراقية ،ادري جا حسين سعيد راتبه منين ياخذه ومصاريف ربعه غير من فلوسنه العراقيين وميزانية دولتنا ،اطيهم انته افلوس واني اواعدك الحكومة ما تحل كهوة حسين تعيس الاولمبية ،، ياعمي خلونا ناخذ نفسنا ونبني مؤسساتنا بشكل علمي وصحيح ،والاتحاد الدولي الي يدافع عن حسين وربعة والله عيب علينا نكون اعضاء بيه ،، والرياضة الي تخلينا ندنك روسنا ونعزف سلام صدام الجمهوري طـــز بيها ،،
قرار الحكومة هواي متأخر لأن الحكومة لو ماخذه هيج قرار من زمان ما اتعرضنا للانتكاسات والفضايح على ايد حسين سعيد وربعة ثانيا هي الحكومة اخذت القرار غير من الشكايات والهوسة الرفعوها اعضاء اللجنة الالمبية نفسهم ، اتدور انته بوية ابو عليوي اذا انته متأكد ان العراق كله راح ينتخبك بالانتخابات الجاية عليمن حشمت الاتحاد على بلدك وكلساع موديلهم رسالة (الحكومة اختطفت رئيس اللجنة وتريد تصفيني لان حكومة طائفية )جا خوية اذا خايف من التصفية اكعد يم امريتك واسكت عليمن تتماطل على المنصب والفلوس ،بس ابشرك يحسين سعيد اكولك زمن عدي انتهى وحثالات عدي الي رباهم على ايدة لازم ينتهون وياه وقرار الحكومة هذا كل الكتل البرلمانية والمجتمع العراقي متفقين عليه يعني العراقيين اختلفوا على اخراج امريكا من العراق بس ما اختلفوا على ازاحتك انت وربعك من هاي الكهوة الاولمبية .وعيب عليك كلساع موديلك رسالة تحشم بيها الاتحادات الدولية على بلدك .
*مدير تحرير جريدة العراقية الصادرة بسدني _استراليا
https://telegram.me/buratha
