ابو هاني الشمري
قال لي صاحبي بحزن وغضبابو هاني:(شفت الاخبار اليوم)فقلت له: خير ان شالله شكو.فقال: اليوم اعلنوا بالاخبار عن جبهة التوافق الجديدة.فقلت : اي شفتها ... عادي.فقال : ياأخي آني تابعت اخبار كل المحطات بعد الاعلان بس ابداً ماشفت ولا سمعت محطة ذكرت انه هذا التجمع طائفي مع العلم انه كل المشتركين بهذي الجبهة من مكون معروف.فقلت : وشنو المشكلة هاي الكتله متحتاج واحد يبحث عن الاشخاص اللي بيها من وسائل الاعلام فهي نار على علم ومعروفة.فقال : مو آني اللي يموتني قهر من اتذكر من اعلنوا عن الائتلاف الوطني بوسائل الاعلام وبدت هاي الوسائل تصرخ هاذا ائتلاف طائفي وكل الموجودين بيه من مكون واحد رغم انه المشتركين بيه من كل اطياف العراق.فقلت : يمعود انته مكبّر الموضوع ومنطيه اكبر من حجمه... لانه من زمان هاي الوسائل تنفخ بقربه مشككه... يعني بالفصيح سالفه عتيكة ومتفيدهم.فقال :يعني شتقصد؟فقلت : الظاهر انت موخوش متابع للموقف العراقي ... شوف عيني؛ هاي الجبهة بعد الانشطارات الاميبية اللي صارت بيها صارت بس اسم يعني الحزب الاسلامي بيها انشطر الى اكثر من مجموعة والانسحبوا من الحزب والانطردوا معروفين من طارق وجماعته وعندك الحساب.. وخلف العليان طفر على غير صفحة ،وصالح المطلك شلع على غير طريق, فالجماعة الموجودين لايحلون ولا يربطون يعني ماكو فايده ونتيجة الكلام الايام القادمة تكشف الحقيقة وراح (ابو كريوه يبين بالعبر).. بمعنى اخر صارت الناس بالمناطق اللي تعتقد هاي الجبهة تمثلها تعرف تنتخب منو ...وطبعا انت تعرف القوى الوطنية اللي الها تأثير بالمناطق الغربية والشماليه وين صارت.فقال : وضّح اكثر.فقلت : انت تعرف حاليا اكبر قوة مؤثرة على الساحة العراقية هي كتلة الائتلاف الوطني وهذا الموضوع اللي مدوخ القوى المعادية ومخليها تتحرك بجنون , ولانه لحد الآن ماعدهم ثغرة على هذا المكون الوطني غير كلمة (تشكيلة طائفية) فمو عجيبة تسمع هاي الاسطوانة يومية يعيدونها علينا بوسائل الاعلام رغم انه هذا الائتلاف موجودين بيه خيرة الناس من بقية المكونات الاخرى وازيدك علم انه الموجودين بالائتلاف من مكونات العراق الاخرى عدهم تأثير بشكل كبير على اصوات الناخبين في مناطقهم ولهذا صار الائتلاف خطر حقيقي على كل التكتلات والاحزاب الاخرى.. فقال : كلام بيه نوع من الصحة لكن اكو تكتلات الها وزن بالساحة وانت تعرفها.فقلت : اعرف تقصد يا تكتل ... لانه هناك تكتلين لهما تأثير حسب توقعك على الساحة وهما التحالف الكردستاني وهذا التكتل ميحتاج ان نناقش موضوعه لانه تكتل قومي طائفي خاص بالاكراد وهؤلاء راح يتحالفون مستقبلا مع اي تكتل كبير يفوز ويحقق لهم طلبات محددة ومعروفة وراح تكون مفاوضاتهم مع التكتلات الفائزة حسب لعبة مدروسة هم يريدونها.اما التكتل الاخر وهو ائتلاف دولة القانون.. وكنت من قلبي اتمنى ان يسير بشكل مستقيم ويكون صريح وصادق مع ابناء الشعب الذين انتخبوا اغلب اعضاءه في مجالس المحافظات الماضية, ولكن ربَّ ضارة نافعة.فقال : يعني شلون؟فقلت : اسلوب الاقصاء اللي اتّبعه جماعة دولة القانون ويه شركائهم بالامس والاخطاء اللي ارتكبوها خلال الايام الماضية والتصريحات المتعالية والمتكبرة التي تصدر من هذا العضو او ذاك جعلتني على علم يقين بأن هذا التكتل سائر نحو الانحدار وخصوصا انضمام مجموعة كبيرة من البعثيين الى هذا التكتل واللي يعتبرهم اغلب ابناء العراق خط احمر لا يمكن ان يقبلون بيه وهذا خطأ قاتل ارتكبته هاي الكتله حتى ان بعض هؤلاء اللي انضمّوا الى تكتل دولة القانون صرحوا علانية وبكل صلافة انهم يريدون عودة حزب البعث الى الانتخابات بشكل رسمي والغاء قانون المسائلة والعدالة اي بمعنى آخر خلي ذوي الضحايا يمسحون ايدينهم بالحايط لانه البعثيين رجعوا من الباب بعد ماطلعناهم بالقنادر من الشباك وكل هذا بفضل جماعة دولة القانون.فصاروا جماعة دولة القانون يلعبون على الحبلين ويه ابناء الشعب فمن باب المالكي خابصنه بمطالبة سوريا بتسليم البعثيين المجرمين الى الحكومة العراقية واخراج الباقين منها بينما هو بالمقابل ترس دوائر الدولة العراقية بالبعثيين ... وبالحقيقة آني من الناس ماعندي ثقة بأي بعثي لانه بنظري كلهم مجرمين حتى وان لم يرتكبوا جريمه اثبتها عليهم القانون.فقال : وضّح اكثر.فقلت :شوف اغاتي... العراقيين يتجاوزون عن خطأ او خطأين او تصرف غير مسؤول من شخص او شخصين ولكن ميقبلون انه واحد يدوس ابطنهم .. ودولة القانون داست ابطن العراقيين كلهم وخصوصا الناس اللي انتخبتهم بمجالس المحافظات وبالتحديد رئيس الوزراء نوري المالكي..راقب مشروعه مال المصالحة الوطنية وعدد المجرمين اللي اطلق سراحهم وحاليا يمشون امام ابواب اهل الضحايا بكل صلف وشوف اعداد البعثيين اللي رجعهم الى مفاصل الدولة حتى صارت الناس تستغيث منهم ومن فسادهم وتخريبهم ومامن مجيب, ومن تروح تراجع اي دائرة من الدوائر فكأنه انت عايش بزمن صدام ويجوز اسوأ بفضل عودة البعثيين... وشوف وزراء دولة القانون وفسادهم ودفاع المالكي عنهم من خلف الكواليس .. هذاك السوداني لعب بوزارة التجارة لعب وما عزله من منصبه الى ان اصدرت المحاكم عليه قرار القاء قبض ومع ذلك طفر للندن وهذا كريم وحيد واصراره على بقاءه رغم فساد وزارته وقيس عليها بقية الوزراء, وشوف مستشارين المالكي من ابو عزام التميمي وباقي الشلة الفاسدة وانت ماشي... وشوف القرارات اللي اصدرها بمنح الامتيازات للوزراء وقادة الحكومة وكأنه العراق ملك خاص للخلفوهم بينما باقي العراقيين ينتظرون قطعة ارض صغيره يبنون عليها بيت رغم كل هاي المساحةالضخمة وما محصلين متر واحد بينما جماعتهم ياخذون احسن المناطق واكبر المساحات... فصارت الناس تكول شيفرق المالكي عن باقي الحرامية والقتله اذا كان هو من المدافعين عنهم وحاميهم.. اذن هاي كلها خطوط حمراء تجاوزها المالكي وتجاوز بيها دماء ضحايا العراقيين ورجّع بيها القتله والمجرمين بمناصب اكبر من اللي كانوا بيها بزمن صدام.. وهيجي خطأ مايمكن للعراقيين وابناء الضحايا يتجاوزونه .. وراح تشوف الايام القادمه شتفرز ..بقى شي مهم لازم تعرفه وهو انه اعداءنا مسخرين كل الامكانات من اجل الانتقاص من الائتلاف اعلاميا او عسكريا او ماديا وبالمقابل يحاولون ينفخون بجسم التكتلات الباقية اللي فارقتها الروح مثل هذا التكتل اللي سموه جبهة التوافق العراقية عسى ان يسوي شي وهمه يعرفون كلش زين ميفيدهم بل وازيدك علم انه هناك تكتلات فرديه لبعض الاشخاص مثل تكتل وائل عبد اللطيف او بعض التكتلات المستقله الاخرى قد تحصل على اصوات اكثر من الاصوات اللي يحصل عليها طارق الهاشمي صاحب تكتل تهديد ( العفو اقصد تكتل تجديد) وحتى اكثر من كتلة التوافق الجديدة او قائمة اياد علاوي لانه الناس صارت مفتحة باللبن ويعرفون اللي يفيدهم من اللي مايفيدهم ... وحاليا احسن الموجود على الساحة العراقية واقواها هو كتلة الائتلاف الوطني العراقي لانه بيها كل اللي نحتاجه رغم انه آني عندي علامات استفهام على بعض اشخاصها لكن لانه الانتخابات ان شاء الله راح تكون بقائمة مفتوحة فأكدر انتخب اللي يفيدني واترك اللي ميفيدني حسب تحليلي.فقال : صدك هسه شويه برد كلبي واطمأنيت !!فقلت له ضاحكا: لتروح بعيد بعد شويه راح ترجعلي مورّث ومشتعل نار.فقال: معقوله .... شلون؟فقلت: راح تسمع اخبار قناة الشر العبثية قناة البزاز ويخلونك تصدك بأنه العراق محتل من قبل النظام الفارسي وأن البصرة لاتتعامل بالدينار العراقي بل عملتها المتداولة هي التومان وان المجاميع الخاصة وجيش القدس فجرت مرقد عدنان خير الله بالقرب من نصب الشهيد انتقاما لدوره البطولي في معركة القادسية الثانية!!.عندها ضحكنا قليلا وسلّم عليًّ مودعا وذهب.
https://telegram.me/buratha
