مفتي مصر وهجوم شرس على الوهابية

( بقلم : امير جابر )

عرف عن الشيخ علي جمعة مفتي مصر انتقاداته للفكر الوهابي المتشدد الا ان هجومه هذه المرة لم يكن عادياً هذا نص الاجابة والتي كتبت نقلاً عن حديثه الصوتي

ماقاله الشيخ علي جمعة مفتي مصر عن الوهابية

سئل : هل يجوز الصلاة في مسجد به ضريح ؟ الجواب : طبعا يجوز، لأن الصلاة في مسجد سيدنا رسول الله تجوز، فالصلاة في المساجد اللي فيها أضرحة تجوز لأن الصلاة في مسجد سيدنا رسول الله أجمع المسلمون عليها، وفيها سيدنا عمر، يقوللي خاصية بالنبي، لأ، دا فيها سيدنا عمر وفيها سيدنا أبو بكر وفيها سيدنا أبو شجاع، والحكاية حلوة خالص ..

ما حكم الصلاة بالمسجد الذي به أضرحة؟

الصلاة جائزة والمسجد جائز والضريح جائز، وبنوا في عهد النبي صلى الله عليه وسلم المسجد على قبر أبي بصير، أمال إيه المنهي عنه في البخاري لعن الله اليهود والنصارى اتخذوا قبور أنبيائهم وأوليائهم مساجد، يعني يسجدون إليها، يعني قالوا قالت اليهود عزير ابن الله وقالت النصارى المسيح ابن الله، سجدوا إليها، ولما تروح الفاتيكان تلاقيهم بيسجدوا لقبر بطرس، لكن بناء مسجد كده على مقبرة ده جائز، يقول الشيخ البيضاوي : وهو من القربات، ففيه فرق ما بين مسجد بمعنى سجد إليه وما بين بنينا عليه مسجد.

أمال الهيصة دي جت إزاي ؟

جت إن فيه جماعة ظهرت اسمها الوهابية، عايزين يخرجوا من الخلافة العثمانية، النبي بيقول ماحدش يخرج عن الخليفة، طب اخرج عليه إزاي ؟؟ يا ترى يا هل ترى ؟؟ أكفره، طب أكفره إزاي ؟؟ ما هو مفيش حاجة تكفَّره، قالك لأ، يبقى إذن نقول إن هو بنى مسجد على الضريح، وهو ده معنى الحديث، عشان نقول عليهم كفار، وما دام كفار وهيدخلوا النار يبقى احنا نعمل انهيار ونضربهم بالقنابل، بالنار، فعملوا كده وقتلوه وخرجوا على الدولة العثمانية، وتعاونوا مع الإنجليز والفرنساوية، وفتنة عمياء صماء إلى يومنا هذا، واحنا بنستصرخ في المسلمين، يا مسلمين التفتوا لتراثكم، شوفوا ابن حجر قال إيه، شوفوا البيضاوي قال إيه، شوف الشوكاني قال إيه، التفتوا، ما تقرو الكتب، هل الصلاة – ويخنفِّلك الواد من دول – هل الصلاة في مسجد فيه ضريح جائز؟ الله!! هو ده دين الله، أمت علينا ديننا أماتك الله، أيوة جائز، وورد في السنة حديث أبو بصير هتعملوا فيه إيه؟ انتو مش بتتبعوا السنة! اشمعنا الحديث ده مخبيينه؟! أخرجه موسى بن عقبة بسند صحيح عن المسور بن مخرمة، ماله؟ إيه الحكاية اللي حصلت؟ فتن! ويقوله إنت مابتجيش للشيخ علي ليه؟ قال يا عم ده المسجد فيه ضريح جوة، طب الضريح فاضي، السلطان حسن ده تاه، قتلوه وراح في داهية، والضريح فاضي جوة، مافيهش حد ...

و احد بقولّه أنا عايز أفهم ، هم متضايقين من علماء الأزهر ليه ؟

قالّي : لسبب بسيط ، إخوانا بيقولولنا يا اخوانا انتو علماء بعد اسبوعين ، اسبوعين بس ، يدخل معاهم الواد من دول يربي لحيته ، يقصر جلابيته ، ينقب مراته ، يقرا نيل الأوطار أو يقرا لابن عثيمين أو يقرا لابن باز أو يقرا الأحاديث الضعيفة والصحيحة للألباني ويبقى عالم ، هيهأ ، فهوا بيقولوا أنا أخليك عالم في أسبوعين وانت بتقوله أخليك عالم في تلاتين سنة يبقى يطاوع مين ؟ قولتله لأ يطاوع أبو اسبوعين ، أسرع ، أحلى ، أجدع ، بس أقرب طريق إلى النار لأنه سيتكلم في دين الله من حيث لا يدري بغير علم وهو يحسب أنه يحسن صنعا ، ياهوه ، أيوة صحيح ياهوه ، يا لطيف ، لأنه قاعد يتكلم أهه بالكتاب والسنة والأحاديث الصحيحة والضعيفة وقال رسول الله ، احذر يا ابني ، خد بالك ، فيه حدوتة كبيرة انت مش واخد بالك منها ، إزاي يعني ؟ ما أهه ، آدي الأحاديث الضعيفة وآدي الأحاديث الصحيحة واديله ، فيها إيه ؟ أنا عالم ، انت عايز تقرفنا وتقول ان انا مش عالم ! يا ابني مش كده ، والله ما كده ، ده الأحاديث اللي انت ظنتها ضعيفة دي مصححة في مكان تاني والأحاديث اللي انت ظنتها صحيحة دي لها معنى تاني ، والآيات اللي انت ملخبط فيها دي لها حدوتة تالتة ، واللغة العربية اللي انت مش عارفها ليها قصة أ*** والتوجه العقدي اللي في مخك متلخبط ، استنى بس مش كده ، ليس هكذا يا سعد تورد الإبل ، أيوة بس أنا عندي فتح الباري على سيديهاية ، كمان يمكن مش فتح الباري نسخة الحلبي مثلا ولّا نسخة السلفية ، لأ ، ده المصيبة على سيديهاية ، يعني مانعرفش إذا كانت كاملة ولّا ناقصة ، طيب ، وبعدين أنا قريت المغني في أربع أيام ، إزاي ؟ قريته في أربع أيام ، وفهمته ؟ احنا كنا بنقرا المغني الربع الأول في عشر سنين ، وبعد ما نقرا في عشر سنين نقوله بقى إيه خلاص انت عرفت إزاي يتقري رَوَّح بيتكم بقى اقراه عشان عشر سنين كتيرة ، وبعض العلماء قرا المغني مغني المحتاج في الأزهر في أربعين سنة ، وبعدين جه الشيخ المراغي قالهم يللا بقى ، انت أديلك أربعين سنة طالب علم فأعطاهم الدكتوراة كلهم لأنهم رفضوا قالوله لأ احنا لسة ماشبعناش ، يا اخوانا مش كده ، الطب ماينفعش يقوده حلاق الصحة ، حلاق الصحة ماينفعش يعمل القلب المفتوح ، فكذلك اللي يقرا الكتب بالطريقة الهلامية دي ، والمهم مصممين ، المسجد اللي فيه ضريح ، المسجد اللي فيه ضريح ، المسجد اللي فيه ضريح ، المسجد اللي فيه .. إيه ده ؟! إيه الخبل ده؟! ده هوس