قناة البعثـــادية .. والبطل منتظر القندرجي ...!

بقلم الكاتب احمد الياسري مدير تحرير جريدة العراقية في استراليا

الله يجويكم خالي وكل عام وانتو بخير بمناسبة قرب انتهاء السنة والله يجفيكم شر اللوكًَية والبعثية والهتلية والقندرجية ..وكل من زاعته الكاع وانحسب علينة امين يارب العالمين ..دعوة مكرود ياربي يتمنى يتخبل اليوم قبل باجر .! بهذا العالم المجنون ..حتى على الاقل من يشوفله سالفه ويريد يعلق عليها يكولون هذا مخبل ومحد ياخذ بحجية ..احسن ما ينوخذ بحجيه وينعلس ! انتم شايفين مرات المساجين من يطبون للسجن يسوون روحهم مخابيل حتى يخلصون من العقوبة ,,هسة اني هم كلما احس العالم اتحرر اشعر بنفس العالم يتحول الى كًبر يريد يخنكني ...

.سويلفتنه لهذا اليوم على قندرة ( صلاح الدين ومنقذ الامة العربية من الضياع ومحرر القدس والجولان من اسرائيل ! وحامل راية الامة العربية ..الي كل فردة قندرة منه تسوه ملايين الدولارات ! الفارس الي رفع راس بلاد الرافدين ... الفارس الي وكف وياه بالمؤتمر حمورابي واشور بانيبال وكاله ... اضرب يا منتظر فانت محرر العراق من امريكا اللعينة ،،، مثيرة الحروب عدوة الشعوب ,, الفارس الي ما ولدته ولادة (( ولدته شخاطه )) وصار عود نار على الامبريالية والخونة والكفرة والاستكبار العالمي ,,, قائد الامة العربية _منتظر الزهدي قصدي الزيدي خطأ بالطباعة ،،،لأن الكمبيوتر مالتي مكبسل ’’’

هذا البطل والمارد العملاق ,,, حطم العروش ودمر امريكا وسحق الاستكبار والتجبر ..... الاساطيل الامريكية دايخه هسه ولابدة بالخليج خاف تطفر عليهم قندرة منتظر وتفجر سفنهم !! لأن اكتشفوا المحللين والعلماء ان قندرة الزيدي بيها مادة ذرية انشطارية تعادل خمسعطش مرة القنبلة مال هيروشيما ...

هذا الفارس الي نسه سيفة بالبيت واجه يقاتل بقندرته التأريخية الي تحمل ايضا قيمة جمالية تعبيرية ..تشير الى مكنونات الذات الرافضة للانكفاء العفناويزي كما عبرت قناة الجزيرة حبيبة الشعب العراقي وعدوة البعث والقاعدة والي نص مراسليها بغوانتنامو ،،، ..هذا الفارس قررن نساء حماس بفلسطين يسمن اولادهن باسمه لأنه البطل الوحيد بالامه العربية الي كدر يحررها بقندرته !!(وهنيئا لأمتنه العربية الي يسجنها المنطق وتحررها القنادر ))

هاي المقدمة عبارة عن جولة بسيطة ببعض المواقع العربية الي سوت من صحفي فاشل مصاب بمرض جنون وهوس الشهرة ، ساعة يسوي روحة مخطوف ويطلع ورة اسبوع حتى يشتهر !! ساعة يستغل تواجده بمؤتمر صحفي بيه رئيس امريكا حتى يطلع بطولاته ويتصرف تصرف اساء لكل صحفي عراقي ,,, اخواني شهد الله ورسوله انا حزين لأن جاي اكتب مقالة عن زعطوط مثل منتظر ، ولولا طلب بعض الاخوة ان اكتب رايي الخاص بالموضوع ما حجيت بهاي السالفة ابدا لأن اصلا متستاهل تشغل فكر أي انسان عراقي او غير عراقي ,, بس من شفت الدول العربية جاي تحرض فضائياتها وتبلغ على تسمية زعطوط بعثي نصير متقدم وعضو اتحاد طلبة عدي وتربية تلفزيون الشباب وتقدمه كبطل قومي استطاع فعل مالم تفعله الجيوش، كًلنه نكتبلنه جم سطر انبه الى القضية وحتى منصير مضحكة للرايح والجاي ,

تدرون اخواني الاعزاء منتظر الزيدي قبل كم اسبوع من وصول الرئيس الامريكي شكال لجماعته ؟كلهم راح اسوي شي ادخل بي التاريخ !! كالوله شنو ؟ كالهم بعدين تعرفون ..تدرون اخواني الاعزاء بهاي السالفه يعني القضية لا قضية انفعال ولا مشاعر وطنية مثل ما جاي تدافع الفضائيات المسيئة للعراق ..الانفعال الوطني حق وكل شخص ينفعل ويحرص على بلده من حقة يعبر بالطريقة الي يشوفها مناسبة على ان لا يتجاوز على القانون ولا يسي الى بلده

بس من يجي شخص وباعترافه شخصيا يكول اني جاي اريد اسوي شي لشهرتي الخاصة يعني لا الها دخل بايتام العراق ولا الاحتلال !! وهوة بنفسه جاي يكول هذا الحجي شلون يجيك واحد ثاني .. ويكوله لا عمي انته مطالب بالحرية مو بالشهرة وانته بطل قومي !! شلون تصير هاي السالفة ..وقناة رغد البغدادية مسوية شاشتها ساحة حرب اناشيد واغاني وطنية تكول رايحيين للحرب وعبد الحميد الصائح الشاعر الجميل ..الي نزع عكال الشعر ولبس عباية البعثية والارهابيين علمود جم فلس مع الاسف عليك يا صديقي ياعبد الحميد شكَد جنت احترم كتاباتك ، حولت ذاتك الشعرية الى بوق دعائي حربي لزعاطيط البعث والساقطين ..كان المفروض بيك تطلع تكول على الاقل منتظر اخطأ حتى تكسبون تعاطفنا حتى تثبتون ان الموضوع ما مفبرك ومنتظر منفعل انفعال شخصي ,, حتى نفصل فعل منتظر اللااخلاقي واللامهني عن منهجية القناة ونجذب اليكول عليكم بعثية ..بس تردون تستغلون الموضوع للاثارة والشهرة والاساءة للاعلام العراقي تقدمون زعطوط مثل منتظر كأنه نموذج لقائد اممي قاد الامة بالقندرة ,,يعني عبد الحميد الصائح وربعه البعثية بقناة البعثـــــــــادية ,, اكدوا بفعلهم ان العمل مدروس ومدفوع ومفبرك ,, من كافئوا منتظر ببيت .. يعني السالفة مرتبة بس كان لازم يلكون فد قندرة منفذة فمالكوا انتن من منتظر الزيدي الي اعتقد جيفة الفندرة اهواي اهون من جيفة عقلة ! وعقل المشغلة ..اني حزين جدا لأن فد يوم شفت مسلسل (سنوات النار ) ومدحته وكلت هاي القناة قدمت للدراما العراقية ,, بس بعد الحادث الاخير ادعوا لمقاطعة قناة البعث الاولى البغدادية وادعوا الاعلاميين الى مقاضاة عبد الحسين شعبان وعبد الحميد الصائح وليس الخشلوك لانهم المديرين الفعليين والمروجيين الفعليين لثقافة القنادر والاساءة الى الاعلام والصحافة العراقية بحجة التهاب المشاعر ومعاداة الاحتلال , حتى قناة الشرقية الي كلنا حجينه عليها هم تعاملت مع الموقف بمهنية واعتبرت منتظر تجاوز حدود المهنية لأنهم اغلبهم صحفيين ويعرفون ميثاق الصحافة بي اخلاقيات اهم اخلاقياته ان ميتم التجاوز على صورة الصحافة ببلدك

الصحافة العراقية صحافة مؤدبة ,,صحافة مثقفة وجريئة .. الصحفي العراقي هو الصحفي الوحيد الي جنن العالم بحياديته واخلاقيته وكلنا نتذكرالشهيدة اطوار بهجت الي اصبحت نجمة في سماء الصحافة بشجاعتها وعزيمتها وحياديتها وجرأتها ..الشهيدة اطوار حققت شهرة ما يحققها مليون صائح ومليون منتظر القندرجي ,,بس مو بالقنادر ولا بالسب والشتم ..بالدم والشهادة ..فالصحافة العراقية الي انجبت كامل شياع واطوار بهجت شلون يجي واحد مثل عبد الحميد العاوي ومنتظر القندرجي ويحاول يشوه وجهها البطولي الناصع ..

تدرون اخوان منظمة الصحافة العالمية بصدد اصدار قرار بمنع كل صحفي عراقي من دخول المؤتمرات ورة حادثة قندرر ... شفتوا انعكاسات الموضوع شلون؟ شفتوا صورة الصحفي العراقي شلون راح تصير بالعالم ؟بسبب ناس تافهين امثال الصائح والزيدي اتذكر من صارت احداث سبتمبر الارهابية الي راح بيها اكثر من اربع الالاف مدني امريكي بري اكو بعض البسطاء من الناس الي يتأثرون بفضائيات العربنجية ..جانوا يكولون ( حيل هذا غضب ربك على امريكا ) ونسوا الي راح بيها كلهم مدنيين .. شنو شصار بعدين؟ شنو انعكاسات حادثة سبتمبر علينه ؟؟ كمنا من نمشي بشوارع سدني واحد يسألك انته مسلم تخاف تكوله خاف يكول عليك ارهابي .. فأخواني اكو قضايا تتعلق بصورتنا الحضارية امام هذا العالم خصوصا واحنا من دعاة حوار الحضارات والتواصل ..منتظر الزيدي اني اول المتعاطفين وياه لو ما اعترف لأصدقائه مسبقا ان الموضوع عبارة عن تصرف للشهرة اولا ..واني اول المتعاطفين وياه لو لازم السماعة وكًال لبوش انته مجرم حرب .. ويحرجه بلغة المنطق امام العالم والفضائيات بالمنطق بالفكر .. مو بالقندرة؟ وشصار ابوش يعني ماعت روحة ؟ ظل يضحك عليه ويتمسخر ويكوللهم حذاءة قياسه اربعين ..وانه يريد يشتهر بهذا التصرف ..بس وكعت بروسنا ..وفضائيات القومجية سوتها قميص عثمان حتى عود يكولون المثقفين العراقيين ما مؤدبيين وابطال الثقافة العراقية هم العاوي والقندرجي ..والديمقراطية العراقية هي ديمقراطية قنادر ..وابطال العراق مصنوعين من جلود القنادر ..هذا قصد الفضائيات العربية بهذا الموضوع والا ليش ما يضربون بوش بالقنادر ببلدانهم ومؤتمراتهم الصحفية ..هذا لو صحفي سعودي لو اردني لو مصري جان طلعوه ارهابي ومجرم وعنده ارتباط بالقاعدة !! لأن خاف يضر بعلاقاتهم وي ابو نعمتهم العم بوش .. مثل ما سووا القاعدة بالعراق مجاهدين ، ومن يكمشونهم بالسعودية ارهابيين وهمه نفس التنظيم ..هاي الامور متمشي علينه بعد وشوفولكم لعبة غيرها الصحفي العراقي صحفي محايد بالدرجة الاولى وثوري وتحدى الارهاب وكتب مقالاته بدمه ..الصحافة السرسرية هي صحافتكم العورة الي تشوف بنص عين ياعربنجية يا دعاة الارهاب ويا اعداء العراق .

احب اشيد على عجالة بدور الصحفيين الابطال الي كانوا حاضرين المؤتمر والي همه القوا القبض على منتظر وسلموا للحماية انتبهوا على الفيلم اخواني اول من كمش منتظر من احزامه كان صحفي مو حماية ترة ..وبعدين اعتذروا من رئيس وزراء العراق ورئيس امريكا على الحادث وكالوا منتظر لا يمثل الصحافة العراقية..واوجه رسالة الى الاخ منتظر القندرجي والاخ عبد الحميد العاوي وعبد الحسين شعبولا ..اطالبكم كصحفي عراقي باعتذار رسمي للصحافة والصحفيين العراقيين لانكم المسئولين الوحيدين عن تشويه الصورة البطولية الحقيقية للصحافة العراقية بجعلكم شخص معتوه مختل عقليا بطل اممي اولا ,,ثانيا قيادتكم لحملة عروبية قصدها الاولى الاساءة للعراق المثقف وتحويلة الى عراق قندرجية ابطاله يصنعون من جلود القنادر فأذا انتم نسجت خيوط عقولكم من هاي الجلود فعليكم ان تكونوا واقعيين وتقدمون سنويات فحصها,, حتى اتدور نتخاطب وياكم عبر الدائرة الرسمية لمستشفى الشماعية واذا انتم تدعون انفسكم مثقفين عراقيين فكونوا شجعان لمرة واعلنوا رفضكم الاساءة لصورة الصحفي العراقي في العالم ,, وسنكون منصفين بالتعاطي معكم ,,اما منتظر القندرجي فأدعوا القضاء العراقي الى محاكمته محاكمة عادلة على اعتدائه على هيبة الدولة ومحاولة الاعتداء على رئيس ضيف , مع احتفاظنا بحقنا كصحفيين بمقاضاته بشكل منفرد على الاساءة الي اساء بها النا ,, اما نقابة الصحفيين العراقيين فعليها ان تكون اكثر واقعية ومهنية وبمستوى الحدث والمسئولية وليعلموا ان البغدادية والزيدي ومن لف لفهم هم من تسببوا باراقة الدماء العراقية من خلال اثارة ثقافة العنف المضاد لكل عمل تغييري ديمقراطي في العراق . وجاي محرم خاف تطلعولكم جم لطميه علىالحسين وتردون اتقشمرون العالم هاي ما تمشي علينه هويتكم الحقيقية يا قناة البعثادية كشفتها قندرة بطلكم وتاج رأسكم منتظر القندرجي واخيرا يا عبد الحميد العاوي اذا تريد تصور الصحفي الذي يكتب ويفكر بقندرته انه بطل قومي فأنشاء الله سيخلق الله بطل قومي جديد يسجل هويته البطولية بقندرة اتكون انته هدفها !!