( المرسل : طالب الدكتوراه كاظم العقابي )
حضرة الوزير المحترم ....
بالبداية اسمحلي اتكلم معاك باللغة العامية بلكت نكدر نوصلّ مشكلتنا الكم ويكدر السادة المسؤولين ان يفهمون ويتفهمون ما دانكتبه لان كتبنا وكتبوا زملائنا وأنبح صوتنا واحنا نكتب ونشكي وننخاكم باللغة العربية الفصحى على اساس احنا طلبة دكتوراه ( أسم الله علينا ) طالعين نكمل دراسة برة والناس كلها عيونها علينا , بس مبين الوزارة والملحقيات الثقافية ودائرة العلاقات الثقافية بالوزارة أذن من طين وأذن من عجين فقررنا نكتب الكم بالجلفي بلكت الله واحد يفهم شدنكول.....
حضرة الوزير ... كلنا كنا ننتقد ماكان عليه وضع الطالب الدارس بالخارج ايام حكومة صدام , رواتب بالعراق قليلة , دعم مالي قليل جدا والطلاب دايحين بالخارج وعيونهم على طلاب السعودية وليبيا وغيرها من الدول ويشوفون ويتحسرون ومحد يكدر يفتح حلكة بحجاية ... زين هسه ورا ما تغير الحال والامور صارت غير شكل بالداخل وبالخارج ورجعت الوزارة تدز طلاب يكملون برة على شكل بعثات دراسية والزمالات مستمرة بيها والنفقة الخاصة هم طلعت ناس هوايه , بس اللي كان قبل 6 سنوات ( بزمن النظام البائد ) هو نفس اللي دا يصير بزمن ( النظام السائد ) : الطلبة دايحين , دعم مالي ماكو واذا اكو يصل ورا 5 لو 6 اشهر من موعده الاصلي, الرواتب بالعراق ربع راتب ولو تحسب الرواتب حساب عرب يطلع اللي كان يستلمه الطالب اللي طلع بالتسعينات احسن من اللي يستلمه الطالب هسه , نقصد راتب العراق , ( ولا يجي احد يحسبها بعدد الالاف اللي نستلمها ترة مو هيج الحساب) وهسه نشتكي ونكتب ومحد يجاوب ولا احد يسمع النا يعني بالمحصلة هيه والماكو سوا .
زين هسه بس نريد واحد مسؤول( الله يحفظه) من الوزارة يطلع ويكول النا شنو السالفة ... شنو الشغلة مقصودة لو محض صدفة ان تتقفل كلها على الطلبة اللي بالخارج لو هيه من باب خلي ننتقم من ذولة اللي تركوا البلد وهو بهاي المحنة وطلعوا يجيبون شهادة من برة . أشو طلاب الهند يشكون , طلاب الصين يشكون , طلاب بريطانيا يشكون , طلاب ايطاليا هم يشكون وغيرهم وغيرهم ... ما معقولة كلهم كذابين ودا يتهمون الوزارة بالباطل لان ترة حصار الوزارة علينا مو طبيعي ...... زين عدنا اقتراح واذا صار الكم منا عهد ان احنا قابلين بيه , خلي الوزارة تصدر امر وتكول خلي كل واحد طالعناه بره يدرس خلي يرجع واحنا ثاني يوم تلكونا يمكم بالعراق , لان والله العظيم وعيون كل المسؤولين الغالية علينا ويانه طلاب من اثيوبيا ( والله من اثيوبيا ) احسن من عدنا باللي يستلموه من دولتهم والا السعودية وليبيا ومصر وعمان وسوريا لا تسولف سالفتهم, الفلوس تصلهم لحسابهم بالبنك ( لا ملحق ثقافي ما يدري بالدنيا شكو ولا سفارة ما تدري عن طلبتها شي ) والرواتب وبطاقات السفر والزيارة للبلد والمؤتمرات والعلاج وووووو.... ما تخلص القائمة , زين السعودية احسن منا ... ميخالف , ليبيا وعمان ... هم مقبولة ... بس ترة اثيوبيا وسوريا ومصر ... هاي مو معقولة , زين حلوا المشكلة أشو بس نقرأ بالاخبار بموقع الوزارة تسلم الوزير 100 مليون لطلاب الزمالات وبرهم صالح يكول رئاسة الجمهورية انطت منحة للبعثات ... اشو طلاب الزمالات رجعوا نصهم وطلاب الزمالات حايرين بحالمهم همه وعوائلهم والنفقة الخاصة تورطوا والكل ضيعوا الخيط والعصفور .
الى شوكت واحنا نظل بس عيونا على طلاب بقية الدول ومسؤولينا ما شاء الله عليهم ما يدرون بالدنيا شكو ماكو لا اللي بالوزارة ولا الملحقين اللي دازتهم الوزارة يرعون الطلبة بالخارج , ترة حل القضية سهل , اللي يريد يخدم بلده ومنتسبي الوزارة اللي هو مسؤول عنها يكدر وبسرعة والشغلة ماينراد الها روحة للقاضي..... وانتوا اللي بالوزارة نصكم مخلصين برة لو تريدون تسووها ( انا ومن بعد ي الطوفان )
على العموم احنا كلنا نحجي وياكم بالعامية عسى ولعل نلكى حل من مسؤول الله يهديه علينا وترى والله والله والله لو ما وضعنا صار اشبه بالدايحين كان ما نزلنا الى هالمستوى بس ترى روحنا طلعت وبعد ما ندري من منو نلكاها وجمالة اللي بالعراق عبالهم احنا هسه ماكو هيج بس المثل يكول اللي يدري يدري والمايدري يكول عدس . وبالتاي جدا ممنونين الكم ولكل واحد يخدم بلده
التوقيع على اساس طالب دكتوراه
https://telegram.me/buratha
