حكومة المستشارين دون السن القانونية 

ضياء ابو معارج الدراجي||    الامثال تضرب ولا تقاس وقد تعلمنا من اهلنا ودواوينهم الكثير من الحكايات والامثال التي قد نستفيد منها في جميع مراحل حياتنا وفي جميع المجالات الحياتية والسياسية والعشائرية وما نسرده هنا هو حكاية ومثل وتشبيه ليس لنا قصد به سوى ايصال فكرة معينة لوضعنا السياسي الحالي الذي اصبح بيد من لا خبرة له يدفع بلدنا الى الهاوية السحيقة التي لا يمكن الخروج منها بعد السقوط . في بداية الخليقة من سوالف كبل كلش كلش قديمة يعني هستوه الدنية بعده تمشي على الحجلة تقرر ان يكون عمر الانسان ٤٠ سنة وعمر الحمار ٤٠ سنة وعمر الكلب ٤٠ سنة  الانسان طبعه فضولي فكام يسال هاي الاربعين  سنة شنو شغلي عملي كالوله انته راح تحكم الارض كلة راح تصير ملكك تسوي بيه كلشي وكلاشي  صفن ابونه وكال قليلة موش خوش واني املك كلشي شوية، المهم معلينة بالانسان، المطي اجلكم الله اقصد الحمار هم صار عندة فضول كال هذه الانسان بس اثنين رجلين وصار ملك جاني شصير (الله) وعندي اربع رجلين وجان يكول واني شسوي بالاربعين سنة كالوله انته راح اجر العرباين وتشيل الحمل وينعل والدي والديك بالشغل غير الدك بالصوندات وتاكل حشيس وتشرب مي بسطل وهناك صفن ابو صابر وهو ابو الصفنات من ذاك الوكت كال اربعين سنة بالتعب ما اريده اريد بس عشرة سنوات كالوله والباقي  وين نوديهن ،الانسان يريد بعد عمر  رأسا كال اطونياهن .هسة اشصار عمر  المطي ١٠ سنوات والانسان ٧٠ سنة الجلب ظل محتار هذا ملك وذاك حمال يسال لا.... ظل يروح ويجي يريد يعرف الاربعين سنة مالته زينه موش زينة  واخير شي لملم شتات نفسه وكال واني شنو شغلي كالوله انته تحرس بيوت وتاكل من فضلات الانسان وتنام بالبرد لو تكضية بالجول يكتلك البرد والجوع وتشبع دفراد وطابوك من جهال الانسان كال واني اربيعين سنة على هذا الحال؟ ماريدها ، اريد بس عشرة كافي علية كالوله والثلاثين سنة وين انوديه.... الانسان ملطلط رفعة ايده كال الي الي جا انه ملك واعيش بس  ٧٠ سنة مو حرام ،المهم اخذهن الانسان هسه صار عمر الانسان ١٠٠ والمطي ١٠ والجلب ١٠ مو لو مو مو. الانسان اول حياته صدك ملك يمشي مختالا فخورا وهم يمشي شنو بالارض  مرحا بس من يزوج و يعبر الاربعين يدخل بطور المطي يودي كلاليك وجيب كلاليك يطلع الزبالة وشيل الجهال مودي الثلاجة للمصلح جايب المبرد من المصلح محمل مسواك وشايل الجهال للمستشفى بس من يعبر السبعين بعد ما بي حيل ويطكه التعب وتزداد خبرته شيدخل بطور الجلب بس ينبح  العفو اقصد بس مشوره روحو جبية الثلاجة روحو اشترو مسواك تعالو روحو نامو اكعدوا طفوا الكهرباء ليش البوري مفتوح واكو بيهم يسمعوه واكو بيهم يغلسون علية يعني يلبسوه لبسه الجلب من ينبح ومحد يديرله بال حسب التربية لحد ما يموت. جبناهه على كم واحد شو بس نبيح وهو بعدة بطور المختالا فخورا حتى طور الحمالة ما واصله.