باقر عبدالرزاق السعداوي
الكلام باللهجة المحلية لأن طالعه من كلبي:أولا بلدي :أتمنى ان يعم السلام في بلدي ، أتمنى أن يتصافح السياسيون في الأعياد ، ويقللون من التراشق الاعلامي بالفضائيات ، وأتمنى ان يضم الطلباني سبحته (ام 25 خرزة) بجيبه ويوقع على إعدام الإرهابيين ، ويكبر نظارته حتى يشوف العراق كله مو بس يشوف كردستان ، وأتمنى ما يهتز بعد راس الدليمي (لأن اهتز كبله شارب صدام وطيروه) وأتمنه الهاشمي يطب للسجن حتى يشوف شعانه أتباع المذهب من قبل الطاغية (كون سجن مابيه مروحة ولا بطانية) ، وأتمنه من ريس مجلس النواب مايروح بعد للسعودية (لأن فلوسهم حرام) ، واتمنة من وزارة التربية تبني مدراس لوليداتنه حتى يدرسون زين ، واتمنى من الحكومة تزرع نخل (حتى نشبع رطب برمضان) ، وان شاء الله ماتطفه الكهرباء بلعبة العراق (حتى يونس يشوف الكول زين ويكول) ، واتمنه من علاوي ان يفز بالليل ويذكر انه شيعي... ، واتمنه ........ثانيا مدينتي ،اتمنه ينطون لأم رحيم راتب تقاعد لو يعينون اله جيسين طحين بالشهر(لو عينون اله وزارة التجارة ماتبطل طبعا) ، واتمنه يكبرون جسر حجي خيون حتى يصير سايدين وتعبر الستوتات براحته ، واتمنه يتعين هشام جارنه (خريج ) خطيه مكرود صارلة خمس سنين يركض ورة التعينات (للشرطة والجيش وحتة راح للتربية والماي ) وماكو نتيجة لان ابوه عاشور تقاعد من الشرطة ، واتمنه ان تبيع ام حسون دجاجتها وتشتري بوفية ام المراية وتحط عليه تلفزيون ملون وتشوف قاط اوباما شنو لونه ، واتمنه يبلطون طريق الفتاحية خطية نترست بيوتهم تراب وابو التكسي يضوج مايروح يريد ثلثتالاف دينار كروة يكول طسات،وبقية المناطق همه تتبلط واتمنى يصير بمكان كهوة عبيد عمارة جبيرة ملونه كلش حلوة وتبقى الكهوة بالطابق الارضي (لان شيابنه ماكدرون يصعدون كلهم فقرات وبواسير)، واتمنى ابو حونه يبيع العربانة ويشتري بمكانه ستوته لان بس هو من جماعته ظل ماعنده ستوته ،واتمنه يصحح القاضي تاريخ ميلادي(30شباط) حته اروح ازور الرضا عليه السلام (فدوة لأسمه) ، واتمنه اكعد الصبح ماتكلي زوجتي روح جيب صمون ، واتمنه يبنون مستشفى ولادة بالشطرة يم 9 نيسان لو على السعداوية وين ماجان حته ماتروح الحوامل للناصرية و يجيبن بالدرب يم الغراف وخاف تصير الغراف فدرالية ويسجلون وليداتنه بأسمهم ،واتمنه يرجعون معمل الطابوك حته تكدر الفقرة تبني غرفه تحميهم من المطر. واتمنه .........
https://telegram.me/buratha
